ዘመኑን የሚያውቁ ጥበበኞች ሰዎች

 

ዘመኑን የሚያውቁ ጥበበኞች ሰዎች

                ክፍል ሦስት

ጥበበኞች የተሻለውን አቅጣጫ ጠቋሚዎች ናቸው፡፡ ጥበበኞች ከራሳቸው በላይ ሌሎችን ይጠቅማሉ፡፡ ጥበበኞች ለወገን ያስፈልጋሉ፡፡ ጥበበኞች የሌሉበት ሕዝብ ወደ ሞት ሊነዳ ይችላል፡፡ በጥበባችን ለሌሎች መትረፍ አለብን፡፡ የኃጢአት ባሪያ የሆነውን ትውልዳችንን መታደግ ይጠበቅብናል፡፡ ሕዝብ ያለ ራእይ መረን እንዳይሄድ አምላካዊ መርህ ልንሰጥ ያስፈልጋል፡፡ ዘመኑን የሚያውቁ የጠቢባን ሰዎችን መለያ ተግባራት በማንበብ ራሳችንን ወደ እነርሱ ቅድስና፣ ጥበብ እና ቆራጥነት እናሳድግ፡፡

ዘመኑን የሚያውቁ ጠቢባን ሰዎች ተግባራት፡-

v  እግዚአብሔር  የፈቀደውን ያደርጋሉ፤ የከለከለውን ይተዋሉ፤አካሄዳቸውን ከእርሱ ጋር ያደርጋሉ፡፡  

v  በክፉዎች መካከል ቢኖሩም የራሳቸውንና የቤተሰባቸውን ቅድስና ይጠብቃሉ፡፡

v  ስለሚከሰቱ ችግሮች ከነቀፋ ይልቅ በፈረሰው በኩል ይቆማሉ፡፡

v  የዘመኑን ክፉ መንፈስ ሰንጥቀው በመሻገር ታምነው ይቆማሉ፡፡

v  ከጊዜያዊ ብልጽግና ጋር ኅብረት የላቸውም፤ ዓይኖቻቸውም ሲከፈቱ የዘላለም መስኮትን ይመለከታሉና፡፡

v  ለእግዚአብሔር ፈቃድ ቅድሚያ ይሰጣሉ፤ ስለፍቅሩ የዓለምን ጥቅም ይተዋሉ፤ ስለ ውለታው ከምቾት ሰገነት ይወርዳሉ፤ ስለ ጥሪው ከሞቀ ቤታቸው ይወጣሉ፡፡

v  እግዚአብሔር በሚከብርበት ሥራ ይጠመዳሉ፡፡

v  እየጠፋ ስላለው ትውልድ በእግዚአብሔር ፊት ይቆማሉ፡፡

v  እንደ ዘመኑ ለመኖር ሲሉ ከክርስትና አላማ አይንሸራተቱም፡፡

v  የሚያዩትን ከፈቃደ እግዚአብሔር አንጻር ይመዝናሉ፡፡

v  የሚሰሙትን በቃሉ ይመረምራሉ፡፡

v  እውነትን በጥበብ ይገልጣሉ፤ ያለጊዜው ለሕፃኑ አጥንት ለአዋቂው ወተት አይሰጡም፡፡

v  ንግግራቸውን በጨው እንደተቀመመ በጸጋ ያደርጋሉ፡፡

v  አመለካከታቸው መልካም፤ ኑሮአቸው በማያምኑት ፊት የሚገለጥ ብርሃን፤ ፍቅራቸው በሩቅ እንደሚያውድ የሽቶ መዓዛ በቅርብ ያሉትን ከማስደሰት ይጀምራል፡፡

v  ጠላቶቻቸውን በሥጋ ልማድና በደም ፈቃድ አይዋጉም፡፡

v  በመከራ ቢከበቡም ከእግዚአብሔር የተነሳ አሸናፊ መሆናቸውን አይዘነጉም፡፡

v  ጨለማ ቢውጣቸውም የነገውን የተስፋ ብርሃን ይመለከታሉ፡፡

v  ሲወድቁ ፈጥነው ይነሳሉ እንጂ ለጠላት እጃቸውን አይሰጡም፡፡ አዲስ የውጊያ ስልት ይቀይሳሉ እንጂ ወደ ኋላ አያፈገፍጉም፡፡   

v  ሁልጊዜ የማይረሳ፡ የማይተው፡ እንደዐይኑ ብሌን የሚጠነቀቅ አባት በዙፋኑ እንዳለን አይረሱም፡፡

ትናንት በነበሩት ዘመናት የዘመኑን መንፈስ በማወቅ ለእግዚአብሔር የተለዩ ጠቢባን አልፈዋል፡፡ ነገር ግን ዛሬም ሥራቸው ይናገራል፡፡ የአዳም የንጽህና ዘመን በመንፈሳዊ ሞት ሲጠናቀቅ የኖኅ የህሊና ዘመን ደግሞ በጥፋት ውኃ ተደምድሟል፡፡ የአብርሃም የተስፋ ኪዳን ዘመን በባርነት ሲታሰር የሙሴ የሕግ ዘመን በአለማመን ተፈጽሟል፡፡ ይህ የጸጋ ዘመን ደግሞ በምጽአት ይጠናቀቃል፡፡ ሞት በራችንን ሳያንኳኳ ዘመኑን በማወቅ፡ በጥንቃቄ በመጓዝ፡ በማስተዋል በመራመድ ፍሬ እንድናፈራ ይህ ጽሑፍ ቀስቃሽ ይሁነን፡፡ የሚበልጠው የእግዚአብሔር መሆን ነውና ከሚያልፈው የዓለም ሥርዓት በመለየት ከመንፈሳዊው ዓለም ጋር ኅብረት እናድርግ፡፡ ሐሰት የነገሰበትን፣ ርኩሰት የበዛበትን፣ጠላት የሰለጠነበትንና ክህደት የተስፋፋበትን ይህን ክፉ ዘመን በማወቅ በጥበብ እንድንመላለስ እግዚአብሔር ይርዳን፡፡ 

                          ወስብሐት ለእግዚአብሔር

በእንተ ማርያም

በእንተ ማርያም

ቀዳማዊት ሔዋንና ዳግማዊት ሔዋን

“ድንግል ማርያምና ሔዋን በምሳሌያቸው በሰውነት ይመሰላሉ፡፡ አንደኛው አካል እውር እና በጨለማ የሚመላለሱ ዓይኖች ሲኖሩት፡ ሌላኛው ግን ንፁህና ብሩህ ዓይኖች አሉት፡፡ እርሱም ለዓለም የሚበቃ ብርሃንን ያፈልቃል፡፡ ይህ የሚታየው ዓለም ሁለት ዓይኖች ያሉት ዓለም ነው፡፡ ግራ ዓይኑ በሔዋን ምክንያት የታወረ ሲሆን ቀኝ ዓይኑ ግን በቅድስት ድንግል ማርያም የበራ ነው፡፡”

የእግዚአብሔር ቃል የሕያዋን ሁሉ እናት ወደሆነችው ሔዋን መጣ፡፡ ይህችም ሞት ይሰለጥንባት ዘንድ ሞትንና እርስዋን የሚለየውን አጥር በገዛ እጆቿ ያፈረሰች የወይን ግንድና የሞትንም ፍሬ ለመቅመስ ምክንያት የሆነች ሔዋን ናት፡፡ ስለዚህም የሕያዋን ሁሉ እናት የተባለችው ሔዋን ለሕያዋን ሁሉ ሞትን የምታፈራ የወይን ግንድ ሆነች፡፡

ነገር ግን ሞት እንደልማዱ ሙታን የሆኑትን ፍሬዎች ሊውጥ በትዕቢት ተሞልቶ እርሱን ወደ ሚገለው ሕይወት እንዲቀርብና በድፍረት በዋጠው ጊዜ የዋጣቸውን ነፍሳት ሁሉ ያስመልሳቸው ዘንድ ከጥንቷ የወይን ግንድ ላይ ቅድስት ድንግል ማርያም ጎነቆለች በእርሷም ውስጥ አዲስ ሕይወት አደረ፡፡

የሕይወት መድኃኒት የሆነው እርሱ ከሰማየ ሰማያት በመውረድ በሟች ፍሬ አምሳል በሥጋ ተሰውሮ በመካከላችን ተገለጠ፡፡ ሞትም እንደለመደው ሌሎች ፍሬዎች ላይ እንደሚያደርገው እርሱንም ሊውጥ ወደ እርሱ በቀረበ ጊዜ ሕይወት የሆነው እርሱ በተራው ሞትን ዋጠው፡፡ ይህ ራሀብተኛ የሚበላውን ሊውጠው የተዘጋጀ ምግብ ሆኖ ነበር፡፡ እርሱን የሚበላውን የበላው ይህ ራሀብተኛ ተስገብግቦ በዋጠው ፍሬ ምክንያት በስስት ውጧቸው የነበሩትን ነፍሳት ሁሉ ተፋቸው፡፡

የተራበ ሞት ጎምጅቶ በዋጠው ፍሬ  ምክንያት በስስት የዋጣቸውንም በማጣቱ ሆዱ ባዶ ቀረ፡፡ የሕይወት ፍሬ ለመዋጥ የተፋጠነው ሞት በፍጥነት በእርሱ ተውጠው የነበሩትን ነፍሳት ተገድዶ ነፃ እንዲለቃቸው ተደረገ፡፡

አንድ እርሱ በመስቀል ላይ በመሞቱ ምክንያት በእርሱ ጥሪ በሲዖል የነበሩ ነፍሳት ሁሉ ነፃ ወጡ፡፡  የዋጠውን ሞት ከሁለት የሰነጠቀው ፍሬ እና ሕይወትን ይሰጥ ዘንድ ተመራምረው ሊደርሱበት ከማይችሉት ዘንድ የተላከው እርሱ ጌታችን መድኃኒታችን ኢየሱስ ክርስቶስ ነው፡፡

ሲዖል ድል የነሳቸውን ሁሉ በውስጧ ሰውራ ይዛቸው ነበር፡፡  ነገር ግን አስቀድማ ድል ነስታቸው የነበሩትን ድል ልትነሳው በማትችለው በአንዱ ወደ ቀድሞ ክብራው ይሄዱ ዘንድ ተገዳ ለቀቀች፡፡ ስለዚህም ሆዱ የታወከበት ሞት ጣፍጠውት የዋጣቸውን ሳይጣፍጠውም የዋጠውም በአንድነት አስመለሳቸው፡፡ የሞት ሆዱ ታመመ ለእርሱም ህመም የሆነበትን  የሕይወት መድኃኒትን በአስመለሰው ጊዜ ከእርሱ አስቀድሞ በእርሱ ተውጠው የነበሩትን ነፍሳትንም አብሮ ተፋቸው፡፡

ሞት ውጧቸው የነበሩት ነፍሳት ወደ ሕይወት ማደሪያ ይሸጋገሩ ዘንድ መስቀሉን ከሲዖል መወጣጫ ድልድይ አድርጎ የሠራ እርሱ እንደመሰላቸው የእንጨት ሠሪው ልጅ ነው፡፡ በአንድ እንጨት ምክንያት ሰው ሁሉ ወደ ሲዖል እንደወረደ እንዲሁ በአንድ እንጨት ምክንያት የሰው ልጅ ሁሉ ወደ ሕይወት ማደሪያ ተሸጋገረ፡፡

በእንጨት መራራ ሞትን ተጎነጨን፡ በእንጨት ደግሞ ጠፋጭ ሕይወትን አጣጣምን፡፡ በዚህም ከፍጥረት ወገን እርሱን የሚቋቋመው እንደሌለ አስተማረን፡፡ ከሞት ባርነት ተላቀን ወደ ሕይወት ማደሪያ እንሸጋገርበት ዘንድ መስቀልህን እንደ ድልድይ የሠራህልን ጌታ ሆይ ለአንተ ክብር  ምስጋና ይሁን፡፡  (መ/ር ሽመልስ መርጊያ, 2003 ዓ.ም, ገፅ 9-10; ሃይማኖተ አበው)

ክርስቲያናዊ ቤተሰብ

ክርስቲያናዊ ቤተሰብ

በክፍል አንድ ጽሑፋችን ቅዱስ ዮሐንስ አፈወርቅ “የመጀመሪያዋ ቤተክርስቲያን የክርስቲያኖች ቤተሰባዊ ሕይወት ነው” በማለት የተናገረውን ኃይለ ቃል መነሻ በማድረግ ቤተሰባዊ ሕይወትን ዳሰናል፡፡ ዛሬ ደግሞ ለክርስቲያናዊ ቤተሰብ ልዩ ትኩረት እናደርጋለን፡፡  

ክርስቲያናዊ ቤተሰብ በክርስቶስ መንፈስ የሚኖሩ፣ በመንፈስ ቅዱስ ጸጋና ረድኤት ሕገ ኃጢአትን በመቋቋም ለሕገ እግዚአብሔር ብቻ ተገዥ የሚሆኑ ሰዎች ኅብረት ነው፡፡ ክርስቲያናዊ ቤተሰብ በክርስቲያናዊ ስነ-ምግባር የክርስቶስን ትምህርት እና አርአያነት በመከተል በሕገ ወንጌል ማለትም በሕገ ተፋቅሮ እና በጸጋ መንፈስ ቅዱስ የተመሰረተ ነው፡፡ ከክርስቲያናዊ ቤተሰብ የሚገኙ ልጆች ለሀገርና ለወገን ጠቃሚ ናቸው፡፡ ትልልቅ የሃይማኖት ሰዎችም የተገኙት ከክርስቲያናዊ ቤተሰብ ነው፡፡

የክርስቲያናዊ ቤተሰብ የቤት ራስ ኢየሱስ ክርስቶስ ነው፡፡ ክርስቶስ የሌለበት ሕይወት ባዶ ነው፡፡ ያለ ክርስቶስ አንዳች ልናደርግ አንችልም፡፡ ሕይወት ያለ ክርስቶስ ሞት ነው፡፡ ሠላምና እውነተኛ መንገድም እርሱ ብቻ ነው፡፡ ኤፌ.6፡10 ፣ ዮሐ.14፡6፡፡ ያለ ክርስቶስ ክርስትና የለም፡፡ እርሱ የሌለበት ትዳር፣ ቤትና ኑሮ ትርጉም የለውም፡፡ የመልካም ቤተሰባዊ ሕይወት መሰረቱ ክርስቶስ ነው፡፡ ክርስቶስን መሰረት ያላደረገ ትዳርና ጎጆ ውጤቱ ጭቅጭቅ፣ ሁከት፣ስቃይ፣ መለያየትና አድመኝነት ነው፡፡ ክርስቶስን ራስ ያላደረ ቤተሰባዊ ሕይወት ጅራት (ኋለኛ) ነው የሚሆነው፡፡ ክርስቶስን ራስ ያደረገ ቤተሰባዊ ሕይወት የመፈቃቀር፣ የደስታ፣ የሠላም የተስፋና የእምነት ምንጭ ነው፡፡ (የኢ/ኦ/ተዋሕዶ ቤተክርስቲያን ክርስቲያናዊ ቤተሰብ መጽሔት, 2000 ዓ.ም, ገፅ 3-5)

የክርስቲያናዊ ቤተሰብ መገለጫዎች መታመን፣ ፍቅር፣መደማመጥ እና መተሳሰብ ናቸው፡፡ ክርስቲያናዊ ቤተሰብ በንትርክ፣ በጥርጥር፣ በጥላቻና በቅናት መታወቅ የለበትም፡፡ ብዙዎች ጋብቻ በመሰረቱ ማግስት አለመተማመን ይጀምራሉ፡፡ ብዙም ሳይቆዩ የፍቺ ጥያቄ ያነሳሉ፡፡ አንዳንዶቹ ከወለዱ በኋላ ይለያያሉ፡፡ ሌሎቹ ደግሞ ስለልጆቻቸው ሲሉ እየተነታረኩ ይኖራሉ፡፡ የእነዚህ ቤተሰቦች መሰረታዊ ችግር ክርስቶስን የቤታቸው ራስ አድርገው ለቃሉም ታዘው አለመኖራቸው ነው፡፡ ክርስቶስ የነገሰበትን ቤተሰብ ጠላት ፀብና ክርክር ሊዘራበት አይችልም፡፡  እርሱ ግዛቱን የማያስደፍር ጌታ ነውና፡፡ ክርስቶስን የያዘ ቤተሰብ ፍቅር ይነግስበታል፡፡ ቅናት ስፍራ አያገኝበትም፡፡

ክርስቲያናዊ ቤተሰብ የእረፍት ሰገነት ነው፡፡ ክርስቲያናዊ ቤተሰብ የእግዚአብሔር አላማ ማስፈፀሚያ ተቋም ነው፡፡ ክርስቲያናዊ ቤተሰብ  የእውነተኛ አማኞች ምንጭ ነው፡፡ ክርስቲያናዊ ቤተሰብ እግዚአብሔር ለሚከብርበት ሥራ ቅድሚያ የሚሰጥ ነው፡፡ ክርስቲያናዊ ቤተሰብ የመንፈስ ፍሬዎች በተግባር የሚነበቡበት የትውልድ አርአያ ነው፡፡ ክርስቲያናዊ ቤተሰብ ለክርስቶስ ቤተክርስቲያን አገልጋዮች ማረፊያ ጥላ ነው፡፡ ክርስቲያናዊ ቤተሰብ የክርስቶስ ወዳጆች ሲገፉ መጠለያ ኤምባሲ ነው፡፡  የክርስቲያናዊ ቤተሰብ ትልቅ ሀብት የክርስቶስ ፍቅር ነው፡፡

በእኛ ቤት ማን ይስተናገድበታል? በቤታችን ምን ይሠራበታል? ቤታችንን ማን ይመለክበታል? ቤተሰባችን ለእግዚአብሔር ወይስ ለሰይጣን አላማ ማስፈፀሚያ ሆኗል?

ዘመኑን የሚያውቁ ጥበበኞች ሰዎች

ዘመኑን የሚያውቁ ጥበበኞች ሰዎች

ክፍል ሁለት  

 

መንጋው ሰላምን እየናፈቀ፤ ፀብን በመጥላት ትውልድ እየራቀ የሰባኪያኑ ሆድና ጀርባ መሆን እስከ መቼ ነው? የሚያንፅ የፍቅር ቃል ለሚናፍቀው ሕዝብ ጥላቻን የምንሰብከው እስከመቼ ነው? ቅድስት ቤተክርስቲያን ከየአቅጣጫው የተጋረጠባትን መከራ የሚከላከሉ እጆች፤ በከበቧት የገሃነም ደጆች ውጊያ ላይ የሚበረቱ ክንዶች ትፈልጋለች፡፡ በስንዴዋ መካከል ጠላት እየዘራባት ያለውን እንክርዳድ የሚነቅሉና እውነት የሚመስል የሐሰት ትምህርቶችን የሚያስፋፉ አንደበቶችን የሚያርሙ ሊቃውንት አጥብቃ ትፈልጋለች፡፡ ከእግዚአብሔር ፈቃድ ውጪ በሆነ መንገድ የሚበለጽጉ ባለጠጎችን የሚገስጹ መምህራን ትሻለች፡፡ በቁሳቁስ ፍቅር የተነሳ ለረከሰ ህሊና ተላልፎ የተሰጠውን ትውልድ የሚመልሱ አገልጋዮችን ትናፍቃለች፡፡

ዘመኑን የሚያውቁ ጠቢባን ሰዎች በዘመናችን በጣም ያስፈልጉናል፡፡ እግዚአብሔር በየዘመናቱ ጠቢባን ሰዎች አስነስቷል፡፡ ከትውልዱ መሃል ለጥሪው የተለዩለት፡ ለተልእኮው የታመኑለት፡ በሕጉ የኖሩለትና ለተፈጠሩበት አላማ ኖረው ያስደሰቱት ወዳጆች ነበሩት፡፡

በህሊና ዘመን የነበረው ጻድቅ ኖኅ በኃጢአተኞች መካከል እየኖረ አካሄዱን ከእግዚአብሔር ጋር አደረገ፡፡ ዘፍ.6፡9፡፡ በዙሪያው ከከበቡት አመጸኞች ጋር አልተባበረም፡፡ ዘመኑን በማወቅ በጥበብ ኖረ፡፡ ስለሚቀረው የዓለም ኑሮ የሚያኖረውን አምላክ አላሳዘነም፡፡ ምድር በተበላሸች ጊዜ አብሮ ያልተበላሸ ፍጹም ሰው ነበረ፡፡ ሥጋ ለባሽ  መንገዱን ባበላሸ ጊዜ አብሮ አልተጓዘም፡፡ ዘመኑን አውቆ እግዚአብሔርን መረጠ፡፡ ለፈቃዱም ራሱን ለየ፡፡  ውኃ በሌለበት ምድረ በዳ መርከብ በመሥራት ታዛዥነቱን ገለጸ፡፡ በዚህም እግዚአብሔር ከሞት አተረፈው፡፡ 2ጴጥ.2፡5፡፡ የሞት ባሕርን በመርከብ እየረገጠ ወደ አራራት ተራራ ከፍ ከፍ አለ፡፡

ዘመኑን የሚያውቅ ጥበበኛ ሰው እንዲህ ያደርጋል፡፡ ክፉውን የዓለም ሥርዓት ሰንጥቆ ያልፋል፡፡ ሰዎች ስለረከሱ አብሮ አይረክስም፡፡ መንገዳቸውን ካበላሹ ሥጋ ለባሾች ጋር አይጓዝም፡፡ እግዚአብሔርን አማራጩ ሳይሆን ምርጫው ያደርጋል፡፡ በዳነበት መርከብ በክርስቶስ ኢየሱስ የሞትን ባሕር እረገጠ ወደ ቅድስና ተራራ ይወጣል፡፡ ከሚመጣው ቁጣ ለማምለጥ አሁን ከዓለም ርኩሰት በክርስቶስ እወቀት ማምለጥ ይጠበቅብናል፡፡ 2ጴጥ.2፡20-22፡፡

በተስፋ ኪዳን ዘመን የነበረው ሎጥ በሰዶማውያን መንደር እየኖረ ከክፋታቸው ተለይቶ እግዚአብሔር የሚደሰትበትን አብርሃማዊ ሥራ ይሠራ ነበር፡፡ ለሰው በከፈተው ደጁ ከዕለታት በአንድ ቀን መላእክትን ተቀበለ፡፡ ዕብ.13፡2፡፡ በቤቱ ያሳረፋቸውን እንግዶች የሀገሩ አመጸኞች ለርኩሰት በመፈለጋቸው እግዚአብሔር የቁጣ ጅራፉን ዘረጋ፡፡ ሎጥ ግን ዘመኑን የዋጀ በአመጸኞች ሥራ ጻድቅ ነፍሱን ያስጨነቀ ጥበበኛ ሰው በመሆኑ አብሮ እንዳይጠፋ እግዚአብሔር አዳነው፡፡ 2ጴጥ.2፡8፡፡ ዘመኑን የሚያወቁ ጥበበኞች ሰዎች ከሚጠፉት ጋር አብረው አይጠፉም፡፡ መዳን ከማይፈልጉት ጋር አብረው አይሞቱም፡፡

ዛሬም ሎጥን በግብር የሚመስሉትን ጥበበኞች ሰዎች እግዚአብሔር ከሞት ይጋርዳል፡፡ ጠቢብ ሰው ከሚያጠፋው የዓለም ሥርዓት ጋር አይተባበርም፡፡ ዋጋውን ተምኖ እና ነገን ተመልክቶ ይኖራልና፡፡ ጠቢብ ስሜቱን ለማስደሰት እግዚአብሔርን አያሳዝንም፡፡ ጠቢብ የሚበልጠውን ያያል፡፡ የሚሻለውንም ያደርጋል፡፡

መጽሐፍ ቅዱስ የብዙ ጠቢባን ሰዎችን ታሪክ ለአርአያነት መዝግቦ ይዟል፡፡ ዳዊትን ያነገሡትን የይሳኮር ልጆች ዐለቆች ደግሞ በተለየ ሁኔታ “እስራኤል የሚገባውን ያደርግ ዘንድ ዘመኑን የሚያውቁ ጥበበኞች ሰዎች… ነበሩ፡፡” በማለት ገልጿቸዋል፡፡ 1ዜና.12፡32፡፡ መጽሐፍ ቅዱስ እነዚህን ጠቢባን በቁጥርም ያውቃቸዋል፡፡ ሁለት መቶ ብሎ ብዛታቸውን ገልጿልና፡፡ እነዚህ ዐለቆች ለሰልፍ የተዘጋጁ፣ የማያመነቱ፣ የጦር መሳሪያ የታጠቁ፣ በጠላት ላይ የጨከኑ፣ ወንድሞቻቸውን የሚታዘዙ እና ዳዊትን ለማንገስ የቆረጡ ነበሩ፡፡

ዛሬም ዘመኑ ምን እንደሚጠይቅ ያወቁ፡ የሕዝቡን ቋንቋ ያልናቁ፡ የአባቶቻችንን ትምህርት የጠነቀቁ፡ በዓለም ጥቅምና በስልጣን ተጽእኖ ስር ያልወደቁ ጠቢባን ዐለቆችንና አገልጋዮችን እንፈልጋለን፡፡

በዳዊት የንግሥና ዋዜማ ታሪክ ከመዘገባቸው የይሳኮር ልጆች ዐለቆች ትልቅ አርአያነትን እንማር፡፡ ሕዝባችን የሚገባውን ያደርግ ዘንድ አምላካዊ ትእዛዝ ለመቀበል በጸሎት እንትጋ፡፡ ለማይቋረጠው ብርቱ የሕይወት ሰልፍ ሁልጊዜ ዝግጁ እንሁን፡፡ በክርስትና ጉዞአችን አናመንታ፡፡ የእግዚአብሔርን ቃል እንታጠቅ ኤፌ.6፡11-17፡፡ የዳዊት ልጅ ክርስቶስን ለማስመለክ በፍጹም ልባችን እንትጋ፡፡ እስከ መቼ ድረስ በዓለም ተረት የመስቀሉን ፍቅር እንሸፍናለን?  እስከመቼ በአገልጋዮቹ ክርስቶስን  እንጋርዳለን?

በዚህ ዘመን የምድሩን ለመያዝ የሰማዩን የሚጥሉ፤ በአቋራጭ ለመበልጸግ ከሰይጣን ጋር የሚዛመዱ፤ ዘመኑን ለመምሰል ልቅ በሆነው የዓለም ሥርዓት የሚረክሱ  እና ስለጊዜያዊ ጥቅም ዘላለማዊ በረከትን የሚተዉ ሰዎች በዝተዋል፡፡

“ከእንቅልፍ የምትነሱበት ሰዓት እንደደረሰ ዘመኑን እወቁ” ሮሜ.13፡11፡፡ እንዳለ ሐዋርያው እንንቃ! ዓለም ካልነቃንባት በጊዜያዊ ምቾት ዓይናችንን እንደጋረደችው ወደ መቃብር እንወርዳለን፡፡ እንዳንቀላፋን የእግዚአብሔርን ማዳን ሳናይ ፍቅሩን ሳናስተውል እንዳንሞት፡፡ ዘመኑን በማወቅ በጥበብ እንመላለስ፡፡  ንግግራችን በጨው የተቀመመ፡ ሕይወታችን እግዚአብሔርን የሚያከብር እና አላማችን ትውልድን የሚያሻግር ይሁን፡፡ ጠባቡን መንገዳችንን በጥንቃቄና በማስተዋል እንጓዝ፡፡        ይቀጥላል…

ዘመኑን የሚያውቁ ጥበበኞች ሰዎች

ዘመኑን የሚያውቁ ጥበበኞች ሰዎች 

                     1ዜና 12÷32

ያለፈው ትውልድ ተሞክሮ የዛሬውን ትውልድ ራሱን እንዲያይ ይጋብዛል፡፡ ብዙ ዘመናትን በፊቱ ያሳለፈው ኤልሻዳይ በዘመናት መካከል ያለፈውን ትውልድ አሻራ ለማስተማሪያነት በመጽሐፍ ቅዱስ አስቀምጧል፡፡ መጽሐፍ ቅዱስ ያለፈውን ትውልድ ማንነት እንደወረደ ገልጾ ያስነብበናል፡፡ የክፉዎችን መጥፋት እና የመልካሞችን ስኬት መዝግቦ ምርጫችንን እንድናስተካክል ይጠቁመናል፡፡ ታሪክ በትናንቱ ኑሮ ዛሬን እንድንመዝነው ይረዳናልና፡፡ እኛም በአምላካችን ፊት በሚያልፈው የዘመን ሥርዓት ውስጥ በመሆናችን የማያልፍ ሥራ እና የሚታይ አሻራ እንድናስቀምጥ ትእዛዝ ተሰጥቶናል፡፡

ቅዱስ ጳውሎስ “እንግዲህ እንደ ጥበበኞች እንጂ ጥበብ እንደሌላቸው ሳይሆን እንዴት እንድትመላለሱ በጥንቃቄ ተጠበቁ፡ ቀኖቹ ክፉዎች ናቸውና ዘመኑን ዋጁ፡፡ ስለዚህ የጌታ ፈቃድ ምን እንደሆነ አስተውሉ እንጂ ሞኞች አትሁኑ፡፡” በማለት የፈቃዱን ምስጢራት በመመርመር በጥበብና በማስተዋል በጥንቃቄም ክፉዎቹን ቀናት እንድናልፍ መክሮናል፡፡

ዘመኑን በማወቅ በማስተዋል እና በጥንቃቄ የሚመላለሱ ጥበበኞች ይባላሉ፡፡ በንጉሥ ዳዊት የንግሥና ዋዜማ “እስራኤል የሚገባውን ያደርግ ዘንድ ዘመኑን የሚያውቁ ጥበበኞች ሰዎች የይሳኮር ልጆች ዐለቆች ሁለት መቶ ሰዎች ነበሩ፡፡” 1ኛ ዜና. 12÷32፡፡ በእኛ ዘመን ግን እነዚህን ሁለት መቶ ጥበበኞች ሰዎች በጭንቅ እንኳ ማግኘት የሚቻል አይመስልም፡፡ በዛሬ ቀመር ውስጥ የወደቀውን ትውልድ እንደቃሉ ብንመዝነው ቀሎ የሚገኝ ነውና፡፡

ምድራችን ፍቅርን ጥለው ጥላቻን፤ ይቅርታን ትተው በቀልን ያረገዙ ምስኪኖች ወድቀውባታል፡፡ አንዱ አንዱን ለሞት የሚፈልግበት ሰዋዊ ሥርዓት ነግሶባታል፡፡ ዘመኑን ባለማወቅ የሚባዝኑ ሰነፎች ሞልተዋታል፡፡ ሐሰትን እንደ እውነት፤ ኃጢአትን እንደ ጽድቅ ቁጠሩልን ባዮች ተቀምጠውባታል፡፡

ይህ ዘመን ከክፉ መሻታቸው ጋር የሚስማሙ አገልጋዮችን የሚፈልጉና እውነት ሲነገር የሚያኮርፉ “አማኞችን”፤ የመዳንን ወንጌል በተረት የሚሸፍኑ ሰባኪዎችን፤ ስለሰው ሞራል ኃጢአትን የሚፈቅዱ መሪዎችን፤ የእውነትን ልዕልና ከማስከበር ይልቅ በኑሮ ፍርሀት ዝምታን የመረጡ አለቆችን አፍርቷል፡፡

በአንጻሩ ደግሞ በዚህ ዘመን የዲያብሎስ ዋሻዎች በጽድቅ እየፀዱ፣ ምሽጎቹም በወንጌል እየፈራረሱ የኃጢአትም ቅጥሮች እጅ ሳይነካቸው እየወደቁ ነው፡፡ በጥቂት የወንጌል ብርሃን ጥቂቶች ክርስቶስን ወደማወቅ ደርሰውበታል፡፡ ከመልካሙ ግን ክፉው ይበዛል፡፡

እንግዲህ እንደ ጥበበኞች ዘመኑን መዋጀት የእኛ ድርሻ ነው፡፡ መዋጀት ማለት ለሌላ ሊሆን የተመደበውን ርስት ዋጋ ከፍሎ በመግዛት ማስለቀቅ፤ ለሞት የተነዳውን ማዳንና ማትረፍ፤ የወገንን ሸክም ለራስ ማድረግና ወገን ሊከፍለው ያልቻለውን ተገብቶ መክፈል ማለት ነው፡፡

ዘመኑን መዋጀት የሚጠበቅባቸው የመቅረዞቹ (የአብያተ ክርስቲያናቱ) ከዋክብት (ዐለቆች) እንደዘመኑ በመኖር መንፈሳዊ ውድቀት የደረሰበትን ትውልድ እንደቃሉ እንዲኖር ማድረግ፤ በኃጢአት ምክንያት የዲያብሎስ ባሪያ ሊሆን የተመደበውን በጽድቅ ቃል መመለስ፤ ወደሞት የተነዳውን ወደ ሕይወት ማሻገርና አትርፎ የእግዚአብሔር ገንዘብ የማድረግ ኃላፊነት አለባቸው፡፡

እግዚአብሔር የቤተክርስቲያን አለቆችን የሾሙበት አላማ ትውልድ በፊቱ መልካም መስሎ የታየውን በማድረግ እንዳያሳዝነው የፈቃዱን ምስጢራት እንዲያስተምሩ እና በክፋት የተያዙትን እንዲገስፁ ነበር፡፡ ነገር ግን የመቅረዞቹ አለቆች በኑሮ ፍርሃት እውነትን አለመድፈር፣ ስልጣንን ለማቆየት ከሁሉ ጋር መስማማትና የሰውን ስሜት ለመጠበቅ የእግዚአብሔርን መንፈስ ማሳዘን ይታይባቸዋል፡፡

ነውር በቅዱሱ ተራራ በግልጥ ቆሞ፣ የእግዚአብሔር ሕግ በአደባባይ እየተሻረ፣ ከእውነተኛዋ ቤተክርስቲያን እውነተኛ አስተምህሮ ፈቀቅ ያሉ ሰዋዊ ትምህርቶች ወደ መቅደሱ እየገቡና እውነት እና እውነተኞች እየተገፉ የመቅደሱ ዐለቆች ዝምታ እስከ መቼ ነው???  

                                               ይቀጥላል…        

የትልቁ ጾማችን ትልቅ ሥራ

የትልቁ ጾማችን ትልቅ ሥራ

እንኳን ለዐቢይ ጾም በሠላም አደረሳችሁ፡፡

ከሰባቱ የአዋጅ አጽዋማት አንዱና ዋናው ዐቢይ ጾም ነው፡፡ ይህ ጾም ጌታችን ኢየሱስ ክርስቶስ ስለጾመው “ዐቢይ” (ትልቅ) ጾም፤ ረዥም ጊዜ ስለሚቆይ “ሁዳዴ”  (ሰፊ) ተብለሏል፡፡

ዐቢይ ጾም የራሳቸው ስያሜ ያላቸው ስምንት እሁዶች ያሉት ሲሆን 55 ቀናትም ይቆያል፡፡

ጾም ማለት ለተወሰነ ሰዓት ከምግብ መከልከል እና ክፋትን መተው ማለት ነው፡፡ ኃጢአት ሁልጊዜ ጾም ነው፡፡ ጾም ሥጋን በመጎሰም ለነፍስ ፈቃድ የምናስገዛበት ሥርዓት ነው፡፡ ጾም ነፍስን ከሚዋጋ ክፉ ምኞት በመራቅ ለእግዚአብሔር ፈቃድ የምንለይበት ሕይወት ነው፡፡ ጾም የቀረበብንን መአት እንደ ነነዌ ሰዎች የምናርቅበት ኃይላችን ነው፡፡ ጾም የራቀብንን በረከት የምናቀርብበት እጃችን ነው፡፡

በጾም ሕይወት ሰጪና ምስጢር ገላጭ ከሆነው ከመንፈስ ቅዱስ ጋር ኅብረት በማድረግ የተሰወሩ ምስጢራትን እናያለን፡፡ በስውር ጾመን የሟች ኅሊና ከማይመረምረው አምላክ የተገለጠ በረከት እናገኛለን፡፡  በትሕትና፣ በይቅርታና በፍቅር ሆነን ብንጾም በመጾማችን ዋጋ እንገኛለን፡፡

ጌታችን ኢየሱስ ለአርአያነት እና ለቤዛነት በሥጋ ተገልጧል፡፡ በአርአያነቱ ከአስተማረን የሕይወቱ ፍሬዎች አንዱ ጾም ነው፡፡ የጾምን ሥርዓት ያስተማረን ጾሞ ነው፡፡ ክርስቶስ እንደ ተጠመቀ ጾምን የሥራ መጀመሪያው አድርጓልና እኛም ጾምን ለአገልግሎታን፣ ለተልእኮአችንና ለሥራችን መጀመሪያ እናድርገው፡፡

በጾም የሚጀመር አገልግሎት ፍሬያማ ነው፡፡ጠላታችንን በጾም ብንዋጋ ድል እናደርጋለን፡፡ በጾም የሚወጠን ሥራ ስኬታማ ነው፡፡ ያለጾም እና ያለጸሎት የማይወገዱ የሕይወት መከራዎች አሉ፡፡ ስለዚህ በጾማችን እና በጸሎታችን የመከራችንን ምክንያት መራራውን ስር እንንቀለው፡፡

ክፉ ምኞቶችን በመግታት፣ ከጸብና ክርክር በመራቅ፣ አንደበታችንን ከሀሜት በመከልከል፣ የሥጋ ድሆችን በምጽዋት፣ የሃይማኖት ድሆችን በጸሎት በማሰብ እንጹም፡፡ ጾሙን በአላማ እንጹም፡፡ ያለ አላማ ከጾምን ግብ አይኖረንምና፡፡

ብዙ መከራዎች ከበውናል፡፡ በተቀደሰው ስፍራ ነውር ቆሟል፡፡ ሀሰት ነግሷል፡፡ እውነትና እውነተኞች እየተገፉ ነው፡፡ የአሕዛብ መሳለቂያ እና የመናፍቃን ስብከት ማድመቂያ ሆነናል፡፡ ስለዚህ የዐቢይ ጾም ዐቢይ ተልእኮ  አብያተ ክርስቲያናቱን ማሰብ ይሁን፡፡ የትልቁ ጾማችን ትልቅ ሥራ በመቅደሳችን ሰላም፤በአገልጋዮቻችን መካከል ፍቅር እንዲነግሥ መጸለይ ነው፡፡ አባቶቻችን ፍትሃዊ ፍርድ እንዲፈርዱ፣ አገልጋዮቻችን በመንፈሳዊ ሕይወት እንዲያድጉ እና ምእመናን ቃሉ በእምነት እንዲዋሃዳቸው፣ ፍሬ እንዲያፈሩ እና ከመጠበቂያው ግንብ እንዳይወርዱ  በጾማችን ልንጸልይ ይገባል፡፡  የትልቁ ጾማችን ትልቅ ሥራ ስለ ፍቅር መቀዝቀዝ መጸለይ ይሁን፡፡

www.betelhemm.blogspot.com

መንፈሳዊ ቁም ነገሮችን ሲፈልጉ ይጎብኙን!!

የቤተልሔም አዋጅ

የቤተልሔም አዋጅ

  አዋጅ … አዋጅ … አዋጅ

       ለትውልድ የሚበጅ

ኑ ብሉ ሥጋውን

ኑ ጠጡ ደሙን

     የአማኑኤልን

አዋጅ … አዋጅ … አዋጅ

      ትውልድን የሚዋጅ

ኑ ወደ ጥበብ ማዕድ

አላዋቂነታችሁ እንዲወገድ

   አዋጅ … አዋጅ … አዋጅ

  እነሆ ልጆቼ የቃሉ ወይን ጠጅ

እንደ ልዲያ በተከፈተ ልብ

ስሙ የሕይወትን ምግብ

   አዋጅ … አዋጅ … አዋጅ

   ለቃሉ ክፈቱ የልባችሁን ደጅ

ለንጉሥ ሥፍራ አስፉ

በኋላ በቀኙ እንድትሰለፉ

  አዋጅ … አዋጅ … አዋጅ

          ለሚሰማ ወዳጅ

ጽድቅን ተከተሉ

ኑሩ እንደቃሉ

ሠራተኞች አብዛ

ሠራተኞች አብዛ

ዘመኔ በከንቱ በጣም እየሮጠ

በክፉዎች ወሬ ልቤ እየቀለጠ

ሕይወቴ በጅምር እንዳይቀር ፈረቼ

በረሃውን አለፍኩ ድምፅህን ሰምቼ

ይናፍቃል ልቤ የቃልህን ወተት

ደግም ተሠረቼ እንድተከልበት

በሰፊው መከርህ ያሰማራሃቸው

ጥቂት ሠራተኞች ምሥራች ተናግረው

ወደ አንተ እንዲያደርሷት ነፍሴ ፈልጋቸው

በመንገድ አስቀሯት ጥቅም አጣልቷቸው

መልካሙን ምስራች ተግተው የሚያወሩ

የተናገሩትን በሕይወት የሚኖሩ

ለእውነት የሚቆሙ ሠራተኞች አብዛ

እንዳይቀር ትውልዱ እረግፎ እንደጤዛ

                                                           ዘኁ 13-15፣ ማቴ 9፡35-38፣1ጴጥ 25፡1-3

የጽናቴ ዋጋ

የጽናቴ ዋጋ

የሕይወት መዝገብ የጽድቄ ማኅደር

የሠላም ከተማ የቃል ኪዳኔ ድር

የደስታ መፍሰሻ የሀዘኔ ድንበር

የብርሃን መውጫ ማርያም የምስራቅ በር

የመከራው ሌሊት የጽናቴ ዋጋ

ከልጅሽ ጋር ነይ ሌሊቱ እንዲነጋ

ሥራህ

 

ሥራህ

ዕርቃኔን የሸፈንክ ያልተሠራ ልብሴ

የውበቴ ፀዳል ክርስቶስ ሞገሴ

የሕይወቴ ወደብ የቤቴ ምሰሶ

ጠላቴን ቀጥተኸው ሄዷል አጎንብሶ

ጨለማን ያስወገድክ የዓለሙ ፋና

ሥራህ ሁሌ አዲስ ነው

እንደ ትኩስ ዜና

በነቢዩ እንቢታ

በነቢዩ እንቢታ

ጉዞአቸው ተገታ

የሰውን ልጅ ጉዞ ሊገቱ፡ ሩጫውን ሊያቋርጡ የሚችሉ ብዙ ወጥመዶች አሉ፡፡ ከእግዚአብሔር ጋር ከተዛመደ ወጥመድን ሰብሮ ጉዞውን ያስቀጥለዋል፡፡ እግዚአብሔር ጉዞውን ከገታ ግን ማን ያስቀጥላል? ቁም ካለ ማን ይራመዳል? ሰው ቢዘጋ እግዚአብሔር ይከፍታል፡፡ እግዚአብሔር ከዘጋ ግን ማን ይከፍታል?

ሰሞኑን የዘከርነው የነቢዩ የዮናስ ታሪክ ማንነታችንን የምናይበት መስታወት ነው፡፡ ታሪኩ በትንቢተ ዮናስ ላይ ተመዝግቧል፡፡ ይህ የትንቢት መጽሐፍ በአንድ ትንቢታዊ ተልዕኮ ላይ ያተኮረ መጽሐፍ ነው፤ የተሰየመውም በባለታሪኩ ስም ነው፡፡

እግዚአብሔር የነነዌ ሰዎችን ክፋት ተመለከተ ዮናስንም “ሒድና እንዳላጠፋቸው የምነግርህን ስበክላቸው” አለው፡፡ ዮናስ “አንተ ቸርና ይቅር ባይ፡ ታጋሽ እና ምሕረትህ የበዛ ስለሆንክ ብትምራቸው እኔ ሐሰተኛ ነቢይ እባላለሁ” አለ፡፡ አገልጋይ ለራሱ ክብር መቆም ሲጀምር የተሰጠውን የጸጋ ስጦታ ቸል በማለት በጎቹን ያስነጥቃል፡፡

ሙሴ “ሕዝቡን ከምታጠፋ እኔን ከሕይወት መጽሐፍ ደምስሰኝ” ብሎ ስለ ሕዝቡ ቆሞአል፡፡ ለሕዝቡ መኖር የርሱን ሞት መርጧል፡፡ ዮናስ ግን እኔ ሐሰተኛ ከምባል ሕዝቡ ይጥፋ ያለ ይመስላል፡፡ ዛሬም ብዙዎቻችን ስለኑሮአችንና ክብራችን እንጂ ስለሕዝቡ መኖር አንጨነቅም፡፡ እንደ ሙሴ ያለ ልብ ይስጠን፡፡

ዮናስ ይባስ ብሎ ከእግዚአብሔር ፊት ለመኮብለል ተነሳ፡፡ ዋጋ በከፈለባት መርከብ ወደ ተርሲስ ጉዞ ጀመረ፡ እግዚአብሔር በባሕሩ ላይ ሞገድን አዘዘ፡፡ መርከቧም ተናወጠች፡ የመንገደኞቹ ጉዞ በነቢዩ እንቢታ ተገታ፡፡ ከእግዚአብሔር ፊት መሸሽ ሞኝነት ነው፡፡ ዮናስ እንቢታው ሳያንስ እግዚአብሔርን በቦታ ወሰነው፡፡ የስሙ ትርጉም “ርግብ” የተባለው ዮናስ የርግብን ባሕርይ ተላበሰ፡፡ ከፊቱ መሰወር እንደማይችል ሲያውቅ ሞኝነቱን አስታውሶ  “ከዐይንህ ፊት ተጣልኩ” ብሏልና፡፡ ብልህነት (ጥበብ) የተለየው የዋሕነት ሞኝነት ነው፡፡

ከእግዚአብሔር ፊት መሰወር አይቻልም፡፡ እርሱ የሌለበት ስፍራ የለም፡፡ “የእግዚአብሔር ዐይኖች በስፍራ ሁሉ ናቸውና” ምሳ. 15፡3 መዝ 138፡፡ አድማሳትን በሚሻገሩ፡ ጨለማ በማይጋርዳቸው ዐይኖቹ የፍጥረትን እንቅስቃሴ ይቆጣጠራል፡፡ እግዚአብሔር በአንድ ጊዜ በሁሉም ቦታ ይገኛል፡፡ በቦታ፣ በሁኔታና በጊዜ አይወሰንም፡፡ እርሱ ምልዕ በኩልሄ ነው፡፡

የዮናስ ጉዞ መጀመር የሌሎቹን ጉዞ ገታ፡፡ ያለ እግዚአብሔር የሚጓዙ የባለራእዮችን ጉዞ ያዘገያሉ፡፡ እግዚአብሔርን እምቢ ያሉ አገልጋዮች የምድር ሸክም ናቸው፡፡ ለተሰጣቸው የጸጋ ስጦታ የማይታመኑ አገልጋዮች ለመርከቧ ይከብዳሉ፡፡ ወዳጆቼ የሌላውን ሸክም እንድናቀል ተሾመን እራሳችን ሸክም ከሆንባቸው አሳዛኝ ነው፡፡ ዮናስ ያለባት መርከብ መጓዝ አትችልም፡፡ ዮናስን ያላወረደ ካፕቴን ደንበኞቹን ያጉላላል፡፡

እግዚአብሔር ሞገድና ማዕበሉ ይታዘዝለታል፤ ነቢዩ ግን በእንቢታ ሽሽት ጀምሯል፡፡ ጌታው ደግሞ በፍቅር ሊያስተምረው ተከትሎታል፡፡ የሚሸሹትን ወዶ የሚከተል እንደ እግዚአብሔር ያለ ወዳጅ ከወዴት ይገኛል? ዓለም መርከብ አዘጋጅታ ተቀበለችው፤ ዋጋ ከፍሎ ገብቶ ከባድ እንቅልፍ ወድቆበታል፡፡ በጊዜያዊ ጥቅም የተቀበለችን ዓለም ዘላለማዊውን በረከት እንዳናይ ዐይናችንን በእንቅልፍ ጋርዳዋለች፡፡ ከባዱ እንቅልፋችን ከባድ መከራ አምጥቶብናል፡፡

የመርከቡ አለቃ “ተነሳና አምላክህን ጥራ” አለው፡፡ አገልጋዮች ተኝተው ተገልጋዮች ሲቀሰቅሷቸው ያሳዝናል፡፡ የመርከቧን ጭነት ወደ ባሕሩ ጣሉ፡ ለመርከቧ ግን ከጭነቱ በላይ ዮናስ ከብዷታልና መጓዝ አልቻለችም፡፡ መንገደኞቹ በዮናስ እምቢታ ምክንያት ጉዞአቸው መገታቱና ጊዜያቸው መባከኑ ሳያንስ የጫኑትን ንብረት ወደ ባሕር በመጣል ከሰሩ፡፡ በነቢዩ እንቢታ ጉዞአቸው ተገታ፡፡

ይህ ክፉ ነገር በማን ምክንያት እንደሆነባቸው ለማወቅ እጣ ተጣጣሉ በዮናስም ወጣ፡፡ ጨክነው መጣል ግን አልቻሉም፡፡ የችግሮቻችንን መንስኤ ማወቅ የመፍትሔ መዳረሻ ነው፡፡ ለውሳኔ አለመቸኮል ደግሞ አስተዋይነት ነው፡፡ የእነዚህ መንገደኞች አስተዋይነት የእኛን ችኩልነት እና ጨካኝነት ይረግማል፡፡

መርከቧ የቤተክርስቲያን ምሳሌ ናት፡፡ ዮናስ የአገልጋዮች፤ የመርከቧ አለቃ የቤተክርስቲያን አለቆች (ጳጳሳት)፤ መንገደኞቹ ደግሞ የምዕመናን ምሳሌ ናቸው፡፡ በማይታዘዙ አገልጋዮች ምክንያት የመርከቧ የቤተክርስቲያን እድገት ተገቷል፡፡ ዛሬ የምናጠምቀው የቀደሙት አባቶቻችን ያስተማሩትን ሕዝብ ነው፡፡ ሕዝቡ የቀደመውን የአባቶቹን ትምህርት አስቦ፡ ቀን ቆጥሮ መጥቶ፡ ዋጋ ከፍሎ ያስጠምቃል እንጂ እኛ አስተምረን ከሌሎች ቤተ እምነቶች ማርከን አላጠመቅንም፡፡ እንደውም ከእኛ ቤት የኮበለሉ ብዙዎች ናቸው፡፡

የበጎቻችን ቁጥር እየቀነሰ ነው፡፡ አንዳንዶቹን ምግብ ነስተን አስመርረናቸው ኮበለሉ፡፡ አንዳንዶቹን አርደን በላናቸው፡፡ ጥንቂቶቹን ሸጥናቸው፡፡ በበረቱ ደግሞ የከሱ ብዙ በጎች አሉን፡፡ የማይታዘዙ አገልጋዮችን ማስተካከል እንጂ ሌላ ጭነት ማራገፍ መርከቧን ሰላም አያደርጋትም፡፡ ለሚፈጠሩ ችግሮች የመርከባችን አለቆች የጸሎት አዋጅ ሊያውጁ ያስፈልጋል፡፡ ስብባችን መፍትሔ ያላመጣው የተወሰኑ ውሳኔዎቻችን ተግባር ያጡት በንጹህ ልቦና በሆነ ጸሎት ስላልተመሰረቱ ነው፡፡ ሁላችንም የምንጸልየው ግላዊ ምኞታችን እንዲሞላ እንጂ የመንጋው እንቆቅልሽ እንዲፈታ አይደለም፡፡ ዕለት ዕለት የአብያተክርስቲያናቱ ጉዳይ እያሳሰበን ይሆን?

በዮናስ መታለል ምክንያት ለሕይወታችን አርአያ የሚሆኑ መንገደኞች አግኝተናል፡፡ አምላካችን በአንድም በሌላም እያስተማረን ነው አላስተዋልንም እንጂ፡፡ ዮናሶች ቶሎ ወደባሕሩ (ወደ ዓለም) እንዲጣሉ አንወስን፡፡ በአሳ ነባሪ ሆድ ሊያስተምራቸው ያቀደላቸው ጊዜ እስኪገለጥ የእግዚአብሔርን ቀን ጠብቁ፡፡

መንገደኞቹ ስለዮናስ ተጠያቂ እንዳይሆኑ ጸለዩ “አቤቱ እንደወደድክ አድርገሀልና ስለዚህ ሰው ነፍስ እንዳንጠፋ እንለምንሀለን” አሉት፡፡ ዮናስን ወደ ባሕሩ ጣሉት እግዚአብሔር ያዘጋጀውም አሳ ነባሪ ተቀበለው፡፡ በሰማችሁት ወሬ ድንጋይ ከማንሳትና ስም ከማጥፋት የሕይወት መምህር መድኃኔዓለም ሙሉ ሰው እንዲያደርገን ጸልዩልን፡፡ ጉዞአችሁን ገትተን፡ ጊዜያችሁን አባክነንና የደከማችሁበትን አክስረን በድለናችኋልና በጸሎት የእግዚአብሔር እጅ ላይ ጣሉን፡፡ አስተካክሎ ሰርቶን እንድንክሳችሁ ያደርገናል፡፡ እሺ ብለን እንድንቆምላችሁ ይሰራናል፡፡

እግዚአብሔር በአሳ ነባሪ ሆድ ውስጥ በሕይወት ማኖር ይችላል፡፡ በእሳት ውስጥ ባለመቃጠል ያሳድራል፡፡ በገዳይ መንጋጋ በሕይወት ያኖራል፡፡ ምዕመናን ሆይ እኛን ተውንና የክርስትናን ጉዞ ቀጥሉ ሂዱ አትቁሙ ራሳችሁን አድኑ፡፡ በአሳነባሪው ሆድ ውስጥ ራሳችንን አይተን፤ ውሆች ውስጥ ምሕረቱ በዝቶልን፤ በጥልቁ የሕይወትን ምክር ተመክረንና እንደገና ተሰርተን እንከተላችኋለን፡፡

ጌታዬና አምላኬ መድኃኒቴም ኢየሱስ ክርስቶስ ሆይ ወደ አንተ ከመድረስ ስላዘገየነው ሕዝብ ይቅር በለን፡፡ ከዮናስ የምትበልጠው ሆይ እንደ ነነዌ ሰዎች የሚመለስ ልብ ስጠን፡፡ ቸር ይግጠማችሁ!!

ትንቢተ ዮናስን አንብቡ

ቤተልሔም

ቤተልሔም ማለት ”የእንጀራ ቤት” ማለት ነው፡፡ ቤተልሔም ከኢየሩሳሌም በስተደቡብ  9 ኪሎ ሜትር ርቃ የምትገኝ ከተማ ናት፡፡ በያዕቆብ ዘመን ኤፍራታ ትባል ነበር፡፡ ያዕቆብ የሚወዳትን ሚስቱን ራሔልን የቀበረው በዚህች ከተማ ነበር፡፡ ዘፍ 35፡46-19፡፡

በመሳፍንቱ ዘመን የአቤሜሌክ ከተማ ነበረች፡፡ መጽሐፈ ሩት 1፡2፡፡ በአቤሜሌክ ዘመን በድርቅ ኮረብቶቿ ገርጥተዋል፡፡ ጓዳዎቿ ተራቁተዋል፡፡ ልጆቿ ተርበዋል፡፡ በኋላ ግን ቀን መጥቶላታል፡፡ እግዚአብሔር ጐብኝቷታል፡፡ ኮረብቶቿ በአረንጓዴ መስክ አጊጠዋል፡፡ ጓዳዎቿ በወይን ዘለላና በማርወለላ ተሞልተዋል፡፡ ማድጋዎቿ በዘይት ተትረፍርፈዋል፡፡ ልጆቿ እንጀራን ጠግበዋል፡፡ሩት 1-2

ከሞት የተረፈችው ኑሃሚንም በሕይወት ተመልሳ እግዚአብሔር ሕዝቡን እንደጐበኘ አይታለች፡፡ ቤተልሔም ሞዓባዊቷን ቆንጆ ሩትን ተቀብላ በገብስ እሸት፡ በወይን ዘለላና በማር ወለላ ያስተናገደች አገር ናት፡፡መጽሐፈ ሩት ከ2-4፡፡ ዛሬም ባዕዳን እንጀራ የሚጠግቡባት ከተማ ናት፡፡

ቤተልሔም የንጉሥ ዳዊት ከተማ ናት፡፡ 1ሳሙኤል 17፣12-14 ሉቃስ 2፡4-11 ቤተልሔም ንጉሥ ዳዊት ለንግሥና የተቀባባት አገር ናት፡፡ 1ሳሙኤል 16፡13፡፡ በባቢሎን ከነበሩት 12 መንደሮች የአንዱ ስም ቤተልሔም ይባል ስለነበር የዳዊትን ከተማ ከዚህ ለመለየት ” የይሁዳ ቤተልሔም ” እያሉ ይጠሯት ነበር፡፡ ኢያሱ 19፡15፡፡

ነቢዩ ሚክያስ መሲህ እንደሚወለድባት ተንብዮ ነበር፡፡ ሚኪ5፡2፡፡ በእርግጥም በዳዊት ከተማ በቤተልሔም ከዳዊት ሥርና ዘር መሲሁ ኢየሱስ ክርስቶስ ተወልዷል፡፡ሉቃ 2፡ 15-17፡፡ነቢዩ ሚክያስ እንደተናገረው ነጋሪት ተጐስሞባታል፡፡ ሰማያዊ ንጉሥ ተወልዶባታል፡፡ የጥበብ ሰዎች ጐብኝተዋታል፡፡ የንጉሥ ሠራዊት ከቧታል፡፡ መላእክት ዝማሬን ለእረኞች አስተምረውባታል፡፡ እግዚአብሔር ተመስግኖባታል፡፡ ሰላም በምድር መሆኑ ተሰብኮባታል፡፡

ቤተልሔም የማይታየው አምላክ በሥጋ ማርያም ተገልጦባታል፡፡ ፍቅር ከዙፋኑ የሳበው ኃይሉ ወልድ ደካማ ሥጋን ነስቶባታል፡፡ ቤተልሔም የሕይወት እንጀራ ክርስቶስ ለተራቡት ምግብ ሆኖ ተገኝቶባታል፡፡ ለተጠሙት የሕይወት ውኃ ሆኖ ከታተመች  ፈሳሽ ከድንግል ማርያም መንጭቶባታል፡፡ቤተልሔም የዓለም ፋና ክርስቶስ ለጨለማው ዓለም ያበራባት ከተማ ናት፡፡ ቤተልሔም የክርስቲያኖች ንጉሥ የክርስቶስ የልደት ስፍራ ናት፡፡

ቤተልሔም የክርስትና ታሪክ መነሻ ከተማ ናት፡፡ ስለ ክርስትና ታሪክ ለማጥናት መነሻችን የቤተልሔም ዋሻ / ግርግም/ ነው፡፡ ቤተልሔም የሰውን ኃጢአት ድል የነሳው ጽድቅ የተገኘባት ከተማ ናት፡፡ ቤተልሔም በዓለም የተንሠራፋውን ሀሰት የሚረታ እውነት የበቀለባት ናት፡፡

ቤተልሔም የሕፃት ደም ፈሶባታል፡፡ ክርስቶስ ተሰዶባታል፡፡ ማቴ2፡16፡፡ ቤተልሔም በውጫዊ ውበቷ ሳይሆን በታሪኳ የብዙዎችን ቀልብ ስባለች፡፡ ቤተልሔም በሃይማኖተኞችም በፖለቲከኞችም ለዘመናት የተፈለገች ሀገር ናት፡፡ ዛሬም የይገባኛል ጥያቄ የበረታባት ከተማ ናት፡፡

ቤተልሔም የእመቤታችን ምሳሌ ናት፡፡ ቅ/ኤፍሬም በድርሰቱ “ ተፈሥሒ ኦ ቤተልሔም ሀገሮሙ ለነቢያት እስመ በሃቤኪ ተወልደ ክርስቶስ፡፡ የነቢያት ሀገራቸው ቤተልሔም ሆይ ደስ ይበልሽ፡ንጉሥ ክርስቶስ ከአንቺ ተወልዷልና፡፡” በማለት አመስግኗታል፡፡

እኛም በአፍና በመጣፍ የምንደግመው የምስጋና ቃል ነው፡፡ ድንግል ማርያም የሕይወት እንጀራ ክርስቶስን የወለደችልን ቤተልሔማችን ናት፡፡ እግዝእትነ ማርያም የነቢያት ትንቢት ፍፃሜ የሆነውን ጌታ ያገኘንባት መሶብ ወርቅ  ናት፡፡ ቅድስት ማርያም የሚያጠግበው እንጀራ የአማኑኤል / የመለኮት/ ማደሪያ ናት፡፡

ቤተልሔም የቤተክርስቲያን ምሳሌ ናት፡፡ ቤተልሔም ምድራውያንና ሰማያውያን በምስጋና እንደተባበሩባት ቤተክርስቲያንም የምድራውያንና የሰማያውያን ቅዱሳን ኅብረት ናት፡፡ ቤተልሔም የሕይወት እንጀራን እንዳስገኘ  ሁሉ ቤተክርስቲያንም የሚያጠግበው የክርስቶስ ሕያው ቃሉ የሚገኙባት የእጀራ ቤት ናት፡፡ ቤተልሔም የነቢያት ሀገራቸው እንደተባለች ቤተ ክርስቲያንም የቅዱሳን ከተማቸው ናት፡፡ቤተልሔም እርቅ እንደተወጠነባት ሁሉ ቤተክርስቲያንም በንስሐ የሚመለሱ ኃጥአን ከመሐሪው እግዚብሔር ጋር አዲስ ግንኙነት የሚጀምሩባት ከተማ ናት፡፡ ቤተክርስቲያን ከቤተልሔም የጀመረውን የክርስትና ታሪክ የምታስቀጥል ታሪክ አውራሽ ናት፡፡

ውድ አንባብያን የብሎጋችንን ስም “ ቤተልሔም” ያልነው ከዚህ እውነት በመነሣት ነው፡፡

-ቤተልሔም የእንጀራ ቤት እንደሆነች ሁሉ ብሎጋችንም የሕይወት እንጀራ / አምላካዊ ቃሉ/ ይነገርበታል፡፡

-ቤተልሔም ያዕቆብ 14 ዓመት ደጅ ጠንቶ ያገኛትን ተወዳጅ ሚስቱን ራሔልን እንደቀበረባት ብሎጋችንም ጥበብን ፍለጋ የደከሙ ዘመኑን የዋጁ ጠቢባን፡ ሰዎች በዘመናቸው የቀሰሙትን / ደጅ ጠንተው የተማሩትን/ መንፈሳዊ እውቀት በክብር ያስቀምጡበታል፡፡

-ቤተልሔም ሞዓባዊቷን እንግዳ ሩትን እንዳስተናገደች ሁሉ ብሎጋችንም በሃይማኖት የማይመስሉንን ከቃሉ ማዕድ በመሳተፍ ወደ ድኀነት የማምጣት ዓለማ አለው፡፡      

-ቤተልሔም የተራቡ ልጆቿ እንደጠገቡባት ብሎጋችንም የቃሉ ናፍቆት ያላቸው ወገኖችን በቃል ወተት ያጠግባል፡፡ ብሎጋችን ለእግዚአብሔር እውነት ያደላ ለሰው አጀንዳ ያልተንበረከከ ንጹህ ማዕድ ያቀርባል፡፡

-ቤተልሔም ንጉሥ ዳዊት እንደነገሠባት ሁሉ ብሎጋችን መንፈሳዊውን ጥበብ በማወቅ በጸጋ የሚሾሙ ልጆችን በአብራኩ ይዟል፡፡

-ቤተልሄም መሲሁ ክርስቶስ ተወልዶባታል፣ ብሎጋችንም ክርስቶስ በፊታቸው ላልተሳለላቸው የክርስቶስን መልክ ያሣያል፡፡

-    ቤተልሔም የጥበብ ሰዎች ጐብኝተዋታል፡ ብሎጋችንም የጥበብ ልጆች ሀሳባቸውን ያካፍሉበታል፡ በብዙዎች ይጐበኛል፡፡

-    ቤተልሔም እረኞች ከመልእክት ጋር ዝምድና መስርተውባታል፡፡ ብሎጋችንም በቃሉ የነጹ፡ ለሰማያዊ ዜግነት የታጩ፡ ከሰማያውያን ቅዱሳን ኅብረት የሚቀላቀሉ ባለራእዮችን የመቅረጽ አላማ አለው፡፡

-    ቤተልሔም እረኞች ከመላእክት ምስጋና ተምረውባታል፡፡ ብሎጋችም ከአመስጋኞች ጋር ለምስጋና የሚሰለፉ ዜጐችን ያፈራል፡፡

-    ቤተልሔም እረቅ እንደተወጣነባት ብሎጋችንም የጠፉት በጐች ክፋትን ጠልተው ወደ እግዚአብሔር በልባቸው እነዲመለሱ ያደርጋል፡፡

-    ቤተልሔም የክርስቶስ ብርሃን ታይቶባታል፣ ብሎጋችንም በአለማወቅ ላሉ ጥበብን፣ በኃጢአት ጨለማ ላሉ የጽድቅን ብርሃንን ያሣያል፡፡

በአጠቃላይ ብሎጋችን ቤተልሔም የተነሣው የክርስትና ታሪክ እንዴት ዛሬ እንደደረሠና ወደፊት እንዴት እንደሚቀጥል መረጃ ይሠጣል፡፡ ቤተልሔማውያንን ያጸናል፤ያጽናናል፡፡ እግዚአብሔር ለእረኞች በቤተልሔም የገለጠውን ምስጢር ኑ እዩ!!

             ስለጐበኛችሁን እናመሰግናለን!!